ENSERA : KELING ENGGAU LAJA BEREBUT KE KUMANG

ENSERA : KELING ENGGAU LAJA BEREBUT KE KUMANG

PEMUKA

    Nyadi kelia ko jerita, Keling enggau Kumang kala tesat tepejuh masuk ngagai menua kitai iban ke diatu. tang lebuh ke tesat nya, diak deh seduai ia mali nama diri nyadi orang bukai laban ke enggai di temu anak mensia orang Panggau Libau. lama seduai ia tesat enda tetemu ke jalai pulai ko jerita, seduai ia ke tesat tu menya laban jadi betaban lari ari menua Panggau Libau enggau menua Gelong. Keno ko Niang ke nusi jerita tu ke kami menya, kebuah seduai ia betaban lari jadi enggau pangan diri, laban petunggal keling ke benama Laja menya kepapas ati ka jadi enggau Kumang. Kala kita ninga orang ke di sebut nama Laja. Nyadi Laja tu anak Sang Gima. Sang Gima tu menyadi Apai Keling Jemuring Gading. Ukai orang bukai seduai tu menya ko jerita segi baru sekali betunggal seduai ia.

TUSUN 1 : LAJA NYUMPIT

       Nyau nguing ngagai jerita meh kitai au!!!…nyadi pagi siti, Tudah Laja tu ko jerita mansang nurun begiga burung ngagai munggu sepiak ngulu aie Batang Panggau. Sepagi-paginya meh tudah tuai begiga ke burung. Sumpit ia burung lalu nadai ga labuh. Nya meh ke ngasuh ati tudah tuai chukup pedis. Bedau puas hati ga ia tu tadi, lalu bejalai ambis munggu dititi, ambis emperan enggau aie di tujah, bukit ambis bukit di tiki ia. Lalu nadai ga burung ulih di sumpit ia. Burung ukai nadai tang nya meh, selalu salah belama di selinting ia. ” Apu…nama sial amat jari tu…baka ke ukai anak orang Panggau ga aku tu” pia deh ko ia mutap bejaku dalam ati. Nama agi deh, nyau kemuas tu tadi, hari pan belabuh silau ko jerita. Nyau majak meh remang nyuruk mua langit. Remang lemai meh nya kini.

  

    Meda hari nyau berupai udah belabuh silau manuk , diak deh ia lalu nuduk ke diri, ba selepak bandir kayu sigi.Duduk meh ia tu tadi merati ke rampa menua enggau puchuk kayu ke ngelingi endurnya, laban tudah tuai ke bedau puas hati begiga ke burung nyau sehari-harinya. Lebuh ia ke duduk nya ko jerita, diak deh ia lalu ninga orang balat amat richah bejalai mansa keruang sungai ke enda jauh ari bandir kayu ia ke duduk diak. Dinga ia orang nyau bisi ke bejaku, bisi ke ketawa meh ko jerita. Nadai ga ia ninga nyawa kelau lelaki, tak munyi nyawa bala indu magang dinga ia. Nya meh tudah laja ke duduk tu tadi lalu nguji niki pun kayu nya tadi, takut ke di peda bala indu ke mansa nya ko jerita. Ia lalu belalai selepak dan kayu besai siti. Arinya meh ia ngelilik bala orang ke mansa nya tadi.

    Nya meh, umba ke pending segi lansik, enda silap, amat bala indu ke tachuh nya tadi, benung bebaie ke pemansai enggau raga mit ke endur engkah ikan. ” Mayuh amai ga ikan ulih kitai neh wai…..peda dek enggi endu Kumang nya, ga bebesai ikan, nya baru bisi di lempis ke lauk lemai tu” pia deh ko indu siku bejaku didinga ia.” Amai meh nya wai….ukai nya ulih laban ga endu Kumang nya semua pengawa…ia ke lebih ari kitai”pia deh ko siku gik ga nyaut. Nya meh ko jerita, tudah Laja ke belalai ba selepak dan kayu nya nyau engkeretut nadai munyi. Dikira ia ga penyampau tubuh indu nya bisi ka 5 iku di peda ia. Patut ga nya tachuh pia deh ko dalam ati ia bejaku kediri.

    

     Nya meh, nyau ngenang bala indu ke nurun mansai nya tadi kitai dulu au!!, nyadi pagi nya, diak deh indai Abang mai sida Kumang, Lulong, indai Mendat, enggau Indai Anchung baum ka mansai sungai. Nya meh ke ngasuh sida tu tadi nurun mansai seharinya lalu pulai lebuh ari nyerumba silau. Ga sida ia enda berasai mansai laban ke rindu betapat ngulih ke ikan mayuh. Ukai nya enda gauk ga sida tu begulai enggau pangan, semina Kumang enggau Lulong indu dara sida serumah ke ka begulai enggau sida ia ke udah indai orang. Nya meh ke ngasuh sida ia selalu nundi Kumang enggau Lulong, di sebut sida ia ila dara tuai, lalu enda belaki….ila sapa ke ka enti umur dah majak tuai wai!!! pia deh ko sidanya nundi seduai ia. Tudah Kumang enggau Lulong ko jerita segi nadai kala pedis ati ti bejaku gagai enggau betundi, dah seduai ia pan selalu nundi bejeput ke tusu sida ke tuai nya laban ke udah lanjut bai nusu ke anak.

     Nyadi, ngambi ke kitai nemu, Kumang tu meh pungka indu di menua Gelong Batu Nakong nyingit nyingong gigi gelumbang, menua rawa lama kena tingkuh gading tulang…Jelai rita meh Kumang tu ko orang ke selalu di sebut kitai ke di baruh ari tu. Mayuh orang ngumbai Kumang tu ukai indu ari Gelong tang ari Panggau Libau, nya salah kaban… laban kelia Kumang segi terubah ia diada ke indai ia menchelak mata di Gelong. Ingat kitak ke asal penatai enggau pemulai orang Gelong ke dibai Bujang Sebalu Ngenang kedua bali nama Batu Anggung Ke Beruntung Mali Balang (apai Tutung).

      Nyadi menya sepengudah sida ke beserara enggau Sengalang Burung ke mulai kediri ke langit, lalu Bala Gemuring Gading mega pindah,ari Tembawai Bejuah, lalu bala Apai Tutung ngemai bala sida ia serumah pindah ke Gelong. Nya alai apai enggau indai Kumang menya nitih ke Apai Tutung tauka Bujang Sebalu ke Gelong ko jerita. Nya meh reti ia Kumang tu segi orang Gelong tang Ukai orang panggau Libau. Nyau sepengudah ia ke jadi enggau Keling baru ia pulai ke Panggau Libau. Pia ko tusut ia. Anang kitai ke biak salah pengingat. Enti orang nanya ila…” Kumang orang dini wai!!!” Pia deh ko tanya, dah nya kitak nyaut ” OOO…orang panggau nya, bini keling, suba ia ada di Gelong, nya menua asal ia” pia deh ko kitak nyaut. Nya baru betul.

LAJA NGAYAP KUMANG

    Nyau nyempelah jerita mimit meh kitai tadi neh wai!!!, minta ampun aku.Mulai baru meh kitai ngagai Laja ke majak engkindang bala indu ke mansa endur ia ke belalai nya tadi. Diak deh ia enda mukai-mukai lalu tulih ke runding. ” Manah aku nitih ke bala indu nya, bisi ga endur aku bemalam lagi, ni alah aku tak tinduk enda pe iga-iga di kerapa kampung tu” pia deh ko runding ia.

     Nya meh ko jerita, Laja lalu belubah nurun ari kayu nya tadi, lalu nyingkang napat ke bekau kaki bala Kumang ke pulai mansai nya tadi. Ia lalu nitih belubah be entunda-udi nitih ari belakang bala indu nya tadi. Bala indu nya segi nadai nemu, nadai ninga bisi orang nitih ke sida ia laban ke tembu bebuti nundi pangan diri sebelah jalai, ni ke ketawa, ni ke bejaku, ni ke beju’-ju’ ke pangan diri meh. tudah Laja segi semampai merati ke ulah sidanya ari belakang.Nya meh tudah laja tu ko jerita, berasai ketap-ketap dada ia lebuh kumang ke ngerinding mua ia ari tisi ko jerita..” apu…bajik amat ga indu nya, bakani enda enti di peda besabung mua neh” pia deh ko pengatal ati tudah tuai.

     

     Umba ga Laja mayanya benung bujang rana-rana. Segi penti ia amat enti tepeda ke indu dara ngemajik nya neh bakih!!! Ngasai ga tudah diri, ti meda indu bajik…langau tama nyawa pan kena suap…ukai nya berasai deh…Tuchum bakih!!! ahhhhh…dah…gayu meh nyawa. Nyangka nya pia meh ko dalam ati tudah Laja tu tadi bejaku ke diri.Kira ke enda ga bangat lama ke udah bejalai, nyau enda berasai diak deh sida ia tadi lalu rembus di belakang pugu rumah berapi orang di rumah panjai. Nya meh tudah Laja tadi nyau ngenung meda pemanjai rumah orang tu tadi ko jerita. Semina ke enda ngemanjai rumah sida ia ba Panggau Libau din.

       Ukai memain ga pemayuh bala rayat rumah Aya Bujang Sebalu ko jerita. Enti kitai muak ari puting setak merening ngagai ke ulu setak nyin, amat tak mesai bulu buk aja mensia di peda. Enti di titi kitai bejalai ko jerita umba enda setak hari bedau meh datai di puting setak din. Empa pemanjai rumah sida di Gelong. Minta ampun kaban nyangka kumbai kitak tak di lagu-lagu ke aku, ga Niang Ajah menya Nusi ke aku bakanya ga. Agi aku ingat lebuh ia ke nusi nyau ngapu!!!! deh bala kami sebuat ke ninga.”APUUUU!!!! panjai amat nya Apai Tuai” ko tudah kami nyaut ia ke nusi jerita tu menya.

       

        Nama agi deh, Laja bedau niki. Agi belalai di lebak , ba tunggul kayu sigi. Sekira ke ka nganti bala indu nya dulu niki nadai di peda. Takut ke kumbai orang ka masung bala indu nya. Ia meh umbas ia hari, kira ke udah petang tegalan ko jerita, ia pan lalu nguing ngagai pala tangga muak ke ari ili. Diak ia lalu ngemerani ke diri ngagau ari baruh. ” OOOOiii…..Jadi rumah kitak….” piak deh ko tudah tuai ngagau. Nadai ga orang nyaut, ” ooooiiii…Aku tu, Bundak, retak pandak, Bundai, pinggai besai, jadi rumah kitak” ko ia ngagau baru kira ke ngena nama belalai meh enggai ke di temu orang penatai.

     

        Nya meh dinga lalu rerejat kaki orang ari ruai nuju pala tangga dinga ia. ” Auuuu!!!Auuu!! ndai….nadai tentu dinga tadi igat, lalu….alau niki kitu ke . niki. Nadai penti, nadai pemali” pia deh ko lelaki siku nyaut ia ari atas muak ke pala tangga. Ninga munyi nya, diak deh ia lalu niki niti tangga nya tadi, ukai nya baruh ga rumah panjai nya laban ke begantung ko jerita, enti labuh ke baruh, ukai utai ngidup ke nyawa…ulih lalu kundim(Mati) nunda ke jaku kitai ke maya diatu.

    “Lalu igat, tu ruai aku, aku ngibun muak ari ili tu. Kitu ke ngelawa tikai kitu, anang duduk ba lubang …mali” pia deh ko apai tuai orang nya bejaku enggau ia. Apai tuai nya tadi lalu tama ke bilik ngambi baku sarang insap. ” Nama pejalai nyau laun amat igat?…ukai ga salah bejalai, nemuai pia, tang enggai enda nanya” pia deh ko Apai tuai nya nanya ke penatai Laja. Nya meh Laja  lalu nimbal, ” ambi ke nyamai didinga nuan aya, aku tu Bundak retak pandak, gela ia Bundai pinggai besai, tesat aku tadi…tesat nyumpit aya nyau rembus ba menua kita ditu” pia deh ko ia madah ke diri.

Nya meh ko jerita seduai ia ke berandau nya tadi lalu enda berasai malam pan nyau udah raya. Nya baru apai tuai nya tadi madah kediri ka tinduk. ” Tinduk tua igat, nyangka nuan lelak, kami ditu mayuh indu dara igat kena merindang malam,ti ka ngayap alau meh. Nyin bilik sida endu Kumang , inya bajik, lalu enda belaki. Tau nguji igat ni nemu….” pia deh ko apai tuai nya bejaku…baka ke nemu utai ke di anti tudah Laja ga jaku nya tadi.

     Ngumba endar ni bakih!!!! enti aku, engkechit enda betanchut ka meh aku di sua ke pinggai, ukai nya kiruh ga ke makai. udah di sungkit. Munyi ko jaku orang ke ngambi lesen deriba….”Lampu hijau(Gadung) bakihh!!!! go head aja….!!!!! peiiiii parai kitai, ngumba diri ko kitak nganu aku ke nulis tu……Tuchum legup enti indu macha tu bakih….ngamama ke diri cikgu tu….ko kitak madah ke aku….peeewwwiit!!! nya ia bulih.

     

      Nama agi deh munyi ko jaku tuai, minta betis disua ke pah….minta rampu, di beri ga entekai….akai dai…idup meh nyawa. Nadai penusah amat ga ka nemu endur bilik sida kumang. Ukai memain ga penusah tudah tuai begiga ke rambai jaku kena betalat ke endur indu ke ulih digayap ia. Gaga amat meh tudah tungkul atau Laja ko jerita.Ngumba!!!! diri. Nyau di pandak kekitai meh jerita bakih au!!! enggai ke aku temu nyau di anu kita nyelawit-nyelawit ke utai ngapa. Nyau meh tudah Laja tu tadi mupuk gegadai, indah enda baka bisi utai di subuk, bisi utai di pelalai ke nyingkang ngagai ruai sida Kumang. Rejat nadai meh dinga…Inggar agi ti taik..tichak labuh. Naka meh ia tu ke bejalai tadi laban takut ke kumbai orang ngenchuri.

       Datai ia ba mua pintu sida Kumang, lalu nguji meh ia muka pintu nya tadi. Di tarit ia, sepi tak lekat, nyangka meh udah di tambit orang ari bilik kini, pia deh ko sagam ati ia. Nya baru Laja tu tadi berunding nguji niki pun tiang siti , kira ke nurun ari sadau meh nya. Di tiki ia pun tiang nya tadi, ia pan lalu datai di sadau din. Lebuh ke datai di sadau, ia lalu nguji nilik ngagai bilik besai, nya baru ia tepeda ke kibung bisi di gantung di puak bilik. Tang ia nadai meh nemu ni bagi kibung Kumang.

      

       Lama diri ga tudah tuai temati kutu, berunding bakani ko ka ngiga kibung kumang. Nya meh laban ati segi enda ulih di pelalai ke agi, kira ke ngemerani kediri meh ia nurun tangga sadau belubah-lubah nuju kibung siti ke mit agi. Datai diak ia lalu nyapa enda bangat inggar ” OOi…ooi, nuan nya kumang?” pia deh ko ia bejaku betelai-telai. Enda ga orang nya dani, nadai kekebut. ” Kumang,.. dani wai.. aku tu datai, ka bekelala enggau nuan..nadai ati jai kami tu” nyangka nya pia deh ko tudah Laja tu tadi bejaku ngerak kumang.

        Udah nya, nyau ngereduas deh tubuh ke dalam kibung tu tadi angkat. ” oo…sapa nuan wai, berani ngerak kami ke benung tinduk jenak, berani ngachau kami ke bemimpi bedau nyemetak” pia deh ko orang nya nyaut ari dalam kibung. ” Oooo…kapa aku ka bula, aku tu Laja … ulih aku tama wai?” pia deh ko ia nanya baru. ” Nadai salah wai…ukai bangat nama-nama deh, kena ke bekelala, kitak ga udah datai.. ni alah lalu pulai” piak deh ko saut orang nya.

        Nama agi deh Laja lalu tama ke dalam kibung. Nya baru ia berasai gaga ati. Amat Kumang meh ke tinduk ba kibung nya. Nyau asai ke di runtuh ke tekang ati ia lebuh ke meda pemajik kumang nyau besenayau baka tenggau panchar bulan, tampak bebendang. Pemurak tubuh dara nyau begenyeling kena tenggau api bedilang.Apu…nyau rerangap tudah tuai, indah enda baka baya ke ngeredayau, nganti langau ke majak nutu. Mata enda kesap-kesap, ” amat bajik indu tu” pia deh ko ia bejaku dalam ati.

      

       lama ia enda tepansut ke jaku. Indah enda nunda ke jaku tuai ” baka puyu mabuk keruh, baka empelekung mabuk ambuh” nadai enda ngemajik nya ga indu nya peda ia. Kumang lalu bejaku enggau ia baru, ” Nama pejalai kitak wai?, ukai ga mali ke bejalai…nyangka ke bisi utai di pinta, utai di tanya…nadai ga salah madah” pia deh ko jaku Kumang. Nyaut ga Laja ” Aku wai ukai ka minta nama-nama, semina ke deka bekelala enggau semak agi, ninga rita kitak wai ke agi rumpas, bungas…nyangka nya ulih nyadi ke gembar, nyadi ke pangan enggau bekaban, manah agi ga enti ulih lebih agi…” pia deh ko saut tudah tuai, kira ke ka malu-malu mimit meh.

        Ukai nya nyamai ga ka nyaut neh bakih!! ngasai ga enti tua, ke ditanya orang bakanya. Puas ngiga jaku ke manah kena besaut. Nya meh tudah kumang laban ke segi nemu, ukai nya Laja aja ke kala udah ngayap ia, mayuh pungka lelaki ke kala nguji bejaku ke leka jaku ke sama munyi nya. Laban ke ngembuan jaku enggau adat ke manah, nyaut enggau manah ga tudah tuai ” Enti ka bekelala, bekaban, bepangan… nadai ga salah wai, ukai nya kitai ngachau orang. Nya utai ke manah…” pia deh ko saut Kumang.

         Kira lantang amat meh ati tudah Laja ninga jaku nya. ” Nya meh wai…manah amai ga penemu nuan, nyau kira ke nyamai meh ati, ukai nya rugi ke bekaban neh wai?” pia deh ko Laja bejaku, seraya ke ka bebetundi mimit. Enti sida ke tuai nemu mai jaku betundi lebuh ke ngayap kelia. Kitai ke baru diatu ni kala ngasai ke utai bakanya. Tak betundi ba telepon aja meh kitai.

          Nya meh tadi, nyau mayuh meh randau seduai ia tu tadi, nadai alah kenang kitai magang nya bakih!!, segi baka ia meh nya. ” Ari tu nyau majak ka nyerumba tawas wai!!, lama mai ga tua udah berandau, siti aja utai ke bedau di tanya ngagai nuan, ka pan enda, ga aku lelaki…ni alah nganti nuan” pia deh ko Laja nyempelah mimit ari randau seduai ia nya tadi. ” Endai….nama deh wai?, nadai salah..tanya diak meh!!” ko Kumang nyaut. Kira ke malu-malu mayau deh tudah tuai ke ka nyebut tu, ka nyalam ke ati enggai ga nyadi, takut ke utai ke di juluk enda datai, di sebut tusah ga mimit, takut ke utai ke di juluk bangat kelalu tinggi enda ulih japai…..AKAI DAI!!!!!! Tusah!!! sebut aja meh punggal….!!!!

        ” Nya meh wai..ka pan enda, ati ga ngansak…malu enggai ga nyadi, ila tebantai meh but..” pia deh ko Laja bejaku baru. Kira ke pedis amat ga ia ke ka mansut ke jaku. Peiiii…..ukai nyamai-nyamai ka nyebut jaku nanya indu neh bakih!!! anang ringik-ringik wai.. ti tekena ke indu sumbung…di ludah orang mua kitai bisi!!!!.

Tu ukai nya indu sengapa ke di tanya, nama udah “Kumang” nyau ke sema ke kitai. Ti Kumang Gawai nadai ga ngawa neh bakih!!!!. Anang nganu aku kitak nye-nyelawit mimit. segi baka utai meh. mesti ka di lagu-lagu mimit. Baka kitai ke manduk lauk, ti nadai bawang, nadai miching tak semina garam aja, ni ka nyamai…amat ke enda…Tuchum bujang!!!!ha..haaa…Nya ia bulih!!!!Nyau ngenang baru meh kitai Laja ke nanya Kumang tu tadi. ” Aku wai…kira ke nanya nuan meh tu sekali ke nuan, udah bisi ambai ati, sulu peraja mata, tauka bisi lelaki ke udah bejanji deka ngambi nuan begulai sejalai idup semati” pia deh ko tudah Laja bejaku, sambil ke betarit ke tunjuk jari ia, di semetak-semetak ke ia. HAAAA……baru nyamai asai…puas hati. ” Ulih ga sebut” pia deh ko dalam ati ia kini.

Tudah Kumang nadai tekenyit lalu peda ia, baka ke nadai nama-nama. Ukai nya semina Laja ke kala nyebut jaku nya. Kira ke semua lelaki ke kala ngayap ia segi nyebut leka jaku nya magang. Kira ke udah manah Laja tu ulih ngetat ke ati enda nyebut jaku nya ari mula tama kibung. Bisi sekeda, empai tama kibung dah nyebut diri ka jadi enggau ia, bisi ga lelaki sekeda nyau nyabak rung-rung pulai pansut ari bilik laban ninga kumang ke nyaut sida ia bedau sedia ka belaki.

Nya meh ke selalu ngasuh orang begau, kumbai bisi orang mati, tengah malam raya nyabak duie-duie….e…eeeh ngemalu anak lelaki….parai kitai!!!!.Ukai main ga ati orang lelaki pama udah keran……munyi ko jaku…Taik bau rengut meh enti di sium, jauh ke kentut…..Sanggup enda makai sebulan munyi ko lagu. Nya manah agi nya bakih!!! bisi sekeda, duri sanggup nengah, api di tujah…naka ga pemula-mula leka jaku nya, neh kaban. Uji asuh ngindik taik manuk lintong enggau sidanya ti sanggup!!!!.

Nya meh tudah Kumang tu tadi lama ga ia enda nyaut. kemuas-muas nya tadi, bejaku ia ” aku wai…ambi nyamai di dinga nuan, ambai ati bedau nadai, orang ke ka enggau jadi bedau meh nadai, tang ngambi nuan nemu…..aku laban udah di padah ke antu ba dalam mimpi, enda tau belaki enti enda jadi enggau orang ke benama Keling, bejuluk Gerasi Nading, Bujang Berani kempang ke datai ari Panggau Libau ke lendat Di biau Takang Isang, Panggau Baruh munyi tingkuh gading tulang, panggau lama munyi kesuh kenyalang” Pia deh ko Kumang nyaut. Bejaku baru ga ia” Nya meh ke ngasuh aku bedau belaki nyentuk ke saritu wai…ukai enggai, ukai nadai lelaki ke kala ngunag nanya aku, tang aku segi terus terang ngagai bala sida ia” pia deh ko Kumang madah ke semua pekara ti nuntung pengidup ia.

“Apu…sayau amai meh buah melanjan ke benung mansau kekitau selepak dan, naka meh bungai ke benung ngerembai agi di wan indu semitan, naka penyayau, tang nadai ko enggau, enda alah ga tak ngarap ke kesa nemunya tak ngetup sebarang alai….kapa sayau ke imbuk buau, enti semina ngarap ke bulu pegari tang kena sempulut raja berani” Berasai tekenyit deh ati Laja, guntur labuh merentum semina ia aja meh ke ulih ninga, hujan labuh naka ia pengelebat enda ulih di tan ke remang, taja leka enda bangat mesai gantang…tang nya semua semina angan ati tudah tuai ke bangat beraie sinu ngenang. Ukai nya bisi guntur, ukai nya bisi hujan ga maya nya……

Beraie amai meh ati tudah anak lelaki . Udah ga ia ninga Kumang bisi nyebut petunggal ia Keling, ukai main-main ga pengudi ati ia. Ari menya ia enda tentu sepenemu enggau Keling laban ia ke enda puas hati ngagai Keling ke ngampu semua pengaruh Bujang Berani. Lebuh sida ke agi mit kelia ko jerita, sida ia di ibun Bujang Tuai di Panggau Libau laban bala apai sida ia ke udah mati di kayau bala Apai Sabit Bekait kelia. Bujang Tuai ko jerita segi bisi bechiping penemu lebuh ke meri pengaruh enggau utai bukai ba sida ia petunggal. Enggi keling semua lebih. Nya meh ke ngasuh Keling ke lebih agi di karap enggau di kesayau ke orang di Panggau Libau.

SEREBANA ATI LAJA

Nya meh ko jerita, pemulai ari Gelong, naka meh penusah ati ia. Nadai ulih tiu enggau leka jaku, enda ulih di sema ke agi. bakatu ko serebana ia:

“Kapa enda aku mati nengali hari, parai mulai ngejang pegi,

Kita ga enda meda ati kami beraie, besehari-hari.

Kapa enda aku ngejang dulu midang tinggang batang,

Kita ga enda meda aie mata kami labuh nerusur puang.

Jauh ke kita rindu, jauh ke kita sinu….

Ketawa kitak ke ka….

Idup nadai meh guna, 

peraja mata dah di pelapa di gigi tangga

Kumang hati ga udah di tanchang

randau menua’

Aiiiiii dehh…….Ila sida ia ngasai

enti tebunsa ngenang ambai,

manah enti sida ulih makai….

Kapa enda diatu kami merinsa..

ila kitak ga….ambi bela bedua’ 

bela mimit….Ni alah aku aja.

Pia deh munyi serebana ia tu tadi…naka meh penyinu ati ia, kengka indu ke di peda lalu enda ga ulih ambi nyadi ke bini.Enti indu sengapa nadai ga ngawa, tu nyau indu ke di kesema.Nya meh munyi ko jaku, manuk lepas jari bau taik. Ka pan enda jaku nya…….

Nya meh ko jerita, ukai ke sebulan, nyau betahun meh tudah Laja tu tadi ke merampau ketegal ke udah meda kumang, tang enda ga ulih jadi enggau ia. Nya meh ngujung ke ia lalu bedendam enggau Keling. Ukai nya nemu utai ulu-ili ga tudah Keling laban ke enda kala betemu enggau Kumang. Ukai nya nemu ga ia diri empu ke mesti jadi enggau Kumang. Orang ke benama Kumang pan ia enda kala meda. Anang ke meda, dah ninga namanya enggau menua Kumang pan ia enda kala ninga.

Tang ko jerita, Laja enda kala madah ke diri kala betemu enggau kumang ngagai bala petunggal ia. Semina ia ke berupai amat enda bagak baka suba enti begulai enggau bala sida Keling lebuh ke ngereja pengawa. Suah agi ia ke nurun ngereja pengawa kediri. Nya meh ke ngujung ke ia lalu bisi ngembuan ati ke enda manah ngagai keling. Ia lalu nyimpan ati jai ngiga chara ngasuh keling enda betemu enggau Kumang. Kapa enda deh…Biar sama enda jadi enggau Kumang. Ambi sama enda ngempu pia deh ko ati ia. Biar bebunuh, biar aku mati, enda meh nyamai Keling ngempu kumang pia aja. Bakanya meh runding ia, segi enda di asuh ia jadi enggau Kumang Keling tu menya Ko jerita laban Laja ke terubah ia tetemu ke Kumang.

KELING NGAMBI KUMANG

        Nya meh ko jerita, malamnya diak deh Keling lalu bemimpi, dalam mimpi ia betemu enggau niang indai ia . Diak deh indai ia lalu bejaku ” Igat Keling, aku enggai enda madah ke nuan, diatu udah chukup maya nuan patut bebini, nyadi aku ngasuh nuan ngiga indu ke benama Kumang. Enda jauh menua sida nya, ba Gelong din kira ke sehari pejalai ngulu Batang panggau” Pia deh ko indai ia bejaku dalam mimpi Keling. ” Anang enda nuan igat, laban lama Kumang udah nganti nuan, enti enda ila berubah ati Kumang. Laban Laja diatu benung nyimpan ati rindu ke ia. ambi ke nuan nemu anak, Laja diatu benung begiga ke chara di kena nyerara seduai, anang enda bejimat anak, ingat ke pesan aku. Enti ulih pagila lalu mupuk nuan ke Gelong” pia deh ko pesan indai ia dalam mimpi Keling.

        Nya meh, lebuh ke dani pagi nya, diak deh Keling lalu tumu ngelawa menyadi ia Pungga, ” Akih!!…mupuk aku ngambi Kumang ke Gelong, laban indai aku ngasuh ngambi ia nyadi ke bini, anang madah ke orang bukai nuan ke pemindah aku au, aku ngarap ke nuan meh meda kitai serumah ditu kejang aku mindah…sema ke aku nadai datai genap timpuh bulan penuh ila, giga ulih kita” pia deh ko Keling bejaku ngagai menyadi ia Pungga. Laban tudah Keling ke enggai ngarap ke Laja sepengudah indai ia ke madah ngagai ia dalam mimpi. Enti ngelama tu nadai ia kala ngelaung ke Laja semua utai.

         Mupuk meh tudah keling tu ko jerita, sepagi-pagi nya udah ke bepesan ba Pungga, ia ke mupuk tu tadi lalu mai semua perengka ia, nadai enda di bai, laban ia ke bejaga-jaga ari penanggul. Indai ia empu udah bepesan ngasuh ia bejimat. Kira ke lama meh ia ke udah bejalai tu tadi alai ia rembus di pendai orang Gelong. laban ke segi Berantu, ukai nya bangat lama ga tudah tuai ngesai ke kaki bejalai. Lama agi kitai ke kemi, bira neh bakih!!!. Enti ia pejalai sehari enggi orang Panggau nyangka nya pejalai betahun enti tubuh kitai mensia ke di baruh ari tu. Nya meh ke disema ke orang. Baka pejalai orang Panggau, kala kitak ninga orang nyebut jaku nya. nya di tuju ke ngagai orang ke tegar bejalai nya.

           Nyau ngenang Keling ke baru datai di pendaie orang Gelong ko jerita, ia enda lalu niki. Diak deh ia lalu macha leka sampie kena ia mali gamal diri nyadi orang ke chukup jai gamal.Nama agi deh, nyau bebali meh gamal tudah tuai nadai enda ngenyaie nya. Kaki ga panjai sepiak, tubuh ga dibalut tebu’, kurap, mata ga pichak sepiak. Nadai enda ngenyaie nya gamal. Nyampau meh bau tengong chiak tudah tuai, nyau bau but aie endur nupi tekura, nyau bau kebok……peiiiii!!!…nadai enda ngenyaie mensia. Manah agi tinduk enggau uduk ari ke tinduk nyium bau Keling ko jerita. Udah nya ia lalu mansang belubah-lubah nuju langkau sigi ke ba semak kaki tangga orang ke berumah panjai diak.

          Datai diak ia lalu ngangau” Jadi rumah kitak wai!!!!…ni kitak, bisi orang di rumah?” pia deh munyi kangau ia. ” Hadi….hadi…isi ohang itu…iki…iki haban” pia deh ko saut bakih siku. Naka ga gaya jaku punggal nya, ga tilur, jaku ga pedis di temu. kasih amat!!!! Nya meh tudah keling tu tadi lalu tepeda ke punggal siku, ga singkung, insak nyau melepu sebelah idung, ngeli ga rabang, jari nyau beteku. Timpang amai ga pendiau inya peda ia. ” Iki…..iki haban…humah ahu…u..uuuhai humah hang hukai, huduk itu” pia deh ko punggal nya bejaku. Manah amat ga saut ia, ukai nya beli’ ga ia semina ke timpang pendiau.

          Nya meh nyau di pandak ke kitai jerita wai, Keling ke diau di rumah punggal nya tadi. Nyadi ia nya di gela’ ke nama Bikong kembai idung, betebu’ burit kuris Tumbong. Nya meh nama orang ke ngempu langkau nya tadi. Nyadi tudah Bikong tu di engkah sida indai ia diau kediri laban ke malu meda pendiau tudah tuai ke enda sebaka enggau nembiak bukai. Ti maya makai dianjung ke orang asi ga tudah tuai. Gawa segi enda dapat. Lama tudah Bikong tu ke diau kediri, suba ukai nya bakanya ga pendiau ia lebuh ke ada, segi baka pendiau nembiak bukai. Sepengudah ia ke bisi buya Kemi’ manching bandir embawang kena sumpah indu Lukong, nya meh ke ngasuh ia timpang. Nya alai orang ke tuai enda ngasuh kitai kemi manching indu Lukong enggai ke timpang pendiau.

           Ngambi ke kitak nemu tudah keling lalu ngaga nama ia Biju. Nyadi diau meh Biju tu tadi enggau Bikong ba langkau nya. Nyadi lemai siti ko jerita diak deh Biju lalu bejaku ngagai Bikong, ” Punggal, lama amat ga aku dah enda ngayan ke diri meda pendiau orang bukai, ni alah aku belalai belama enggau nuan ditu, Ukai aku bisi penyalah alai ke belalai deh, ngasuh nuan enti aku bejalai ke rumah panjai?” pia deh ko Biju( keling) bejaku enggau Bikong. ” Eee…ahang honggal, hagi hetawa ke ohang huan, heda hamal huan. hadai ibuh hin deh…hah ahu he ohang hitu hempu han hetawa he ohang” pia deh ko Bikong nyaut ia.

         ” Nadai tau pia punggal, kitai ga anang ringat ti orang ketawa, ba sida ia ketawa laban ka begagai, anang aja sida ia nganu kitai” ko Biju ga nyaut baru. ” ahang ho huan ga hunggal, ahu henggai hin, henggai ahu, halu” pia deh ko Bikong nyaut. Ninga munyi nya, nyau meh tudah Biju tu tadi nyingkang, singit-singit pejalai ia laban ke timpang niki tangga. Nya meh bala sida ke nembiak mit ke benung bemain di ruai nyau begau lari nyabak enda peiga-iga….” antu….antu datai, lari kitai” pia deh ko sida ia lari tama ke bilik. Nya meh bala sida ke tuai nyau begau ninga bisi antu datai niki tangga. ” Apu!!!! ni antu, antu nama bangat ngeraya nya nyu ambis berani niki ke rumah nyengenda nya” pia deh ko bala sida ke tuai bejaku, ninga bala sida ke nembiak besebut.

          Nama agi deh, nya meh nyau pansut magang bala mensia ke di bilik ninga orang ke tachuh di ruai. Sama bela ka nemu, amat ke antu, amat ke mensia kini orang ke datai nya. Nya meh tudah Biju ko jerita lalu bejalai belubah laban ke ngasai ke diri nyau ngasuh bala mensia diak balat tekenyit. Diak ia tadi lalu belubah-lubah mansang semak ngagai apai tuai siku ke benung bediri chegi-chegi merening ia, diak deh ia lalu bejaku ” Anang takut kitak wai…mensia aku, ukai antu, isa meh aku tu jai gamal, ga udah di atur petara baka tu” pia deh ko Biju bejaku nunga apai tuai nya.

” Lapa ga enda unggal, enti antu ni nemu bejaku…lalu unggal, duduk…” pia deh ko apai tuai nya madah ke ia. Kira ke ngasauh ia duduk, tang jaku apai tuai nya ka semadi-semadi ga munyi. Ni enda deh, nyau geli mata meda orang ke bangat ngenyaie nya gamal. Nya meh tudah Biju lalu nuduk kediri, ia enda duduk di tikai ko jerita, ia lalu duduk ba burit lesung ke bisi mesai 3 pemerap ke dungu-dungu tisi pun tiang sigi. Lebuh ia ke duduk nya tadi, dinga nyau bekesetak lesung nya merekah, lalu tepambar pechah kena lantak tumbung tudah Biju. ” Apu….nama lesung tu keru’ amat kayu deh unggal” pia deh ko Biju nyempelah. Nya meh tudah apai tuai nya tadi nyau rangap-rangap meda utai ke nyadi. ” Amat pama mensia tu” pia deh ko ati ia.

“Eh…lesung lama nya unggal, ni enda keru’ kayu nyau udah embih di pakai derung” pia deh ko apai tuai nya tadi bedalih. lama ia nyau ngaru pala ko jerita. Ni ka lesung lama, baru tembu kemari lesung nya, lalu bedau di kena. ” Nama pejalai nuan unggal, kemaya nuan datai? ukai ga salah ke nemuai” pia deh ko apai tuai nya nanya ia baru. ” Eh…bisi ga pejalai unggal, ka ngelawa sida apai Kumang, ni bilik sidak deh?” pia deh ko Biju nanya. ” Nyin ia unggal ke no 4 ari bilik aku tu muak ke ari setak ulu” ko apai tuai nya madah ke ia. Nya meh tudah Biju lalu madah ke nama diri, madah mega ke penatai ia ke bemalam ba langkau Bikong ngelamatu. 

Udah seduai ia ke berandau nya tadi, Biju lalu madah ke diri ka angkat ngelawa bilik sida Kumang. Laban ke udah mayuh ga randau seduai ia, tudah Biju enggai ga bangat kelalu lama berandau, takut ke utai ke di tuju enda di kereja. Nyau meh ia tu tadi ko jerita nyingkang lubah nuju bilik sida kumang. lengka ke kitai dulu pejalai Biju ngelawa bilik sida Kumang au!! kitai ngenang Laja ke agi idup merampau di Panggau Libau ngenang Kumang…….

LAJA NYEMPULANG KELING KE GELONG

Nya meh ko jerita, sebulan nandan di langit, setahun nampun di bukit. Ati beraie enda ulih di tipang, runding ke tusut enda ulih puang, sekut seput enda ulih lantang….. Nya meh tudah Laja ko jerita semampai enda senang duduk, enda lantang tinduk laban ke seruran ingat ke Kumang. Tambah agi ia udah nemu Keling ke lama udah enda di peda, enda temu tunga, nyau majak tusut deh runding ia, kada enda udah ngiga Kumang kini, kada enda udah jadi kini? pia deh ko tudah runding ia. 

Nya alai pagi siti, tumu tudah Laja tu ngemas rengka diri kira ke ka mupuk nunga ke menua Gelong. Dalam ati ia segi deka naban ke Kumang. Udah nadai runding agi meh ia ko jerita. enti enda ulih jadi ngena chara manah, ka pan enda ngena chara bukai meh. Pia deh ko runding tudah Laja tu tadi. Semua perengka kebal, ngayau mulau, pengaruh di bai ia magang-magang ambi ke nyamai kena bepesindang tubuh diri sema’ ke bangat pedis be ambi ke Kumang. Nya meh ko jerita, laja lalu mupuk bejalai ngejang ke menua Batang Panggau, ia bejalai laju ngulu aie Batang Panggau nyelinting tunga ke menua Gelong.

Nyadi pejalai ia tu tadi kira ke nyamai laban ia ke udah nemu jalai ke menua Gelong, ga ia suba udah kala kin. Nya meh ko jerita, Laja ke bejalai tu tadi diak deh ia enda berasai nyingkang lalu labuh ba lubang tanah ke chukup ia penalam. Lama deh tudah Laja  ngasai kediri lalu enda terengkah, semina kesuh angin ke beribut muput ia ke labuh nya aja ulih di sepi ia. Ambi ke kitai sama nemu, tudah Laja ke labuh nya tadi bisi ka 7 hari 7 malam nya baru ia terengkah di menua bukai. Nyadi menua nya, menua Aya Raja Belut. 

Lebuh ke terengkah nya tadi, dinga nyau merentum !!! deh tubuh tudah Laja, Tanah nyau ngeruang, rumah panjai Raja belut nyau beguyang, menua nyau berenyang, peda  deh bala Raja Belut nyau merangap tegepang nyepi utai bangat ngemalat nya. Nya meh bala Raja Belut serumah nyau begau. ” o…. nama meh utai ke bangat nyelaie ngenyadi tu” Pia deh ko tudah Raja Belut bejaku dalam ati. ” Kada enda munsuh datai” Pia deh ko ati tudah tuai.

Nama agi deh Raja Belut lalu bekangau, ngesah pungka manuk sabung raja berani ia ngetan ke menua, nyangka tak munsuh datai. Nyau ngenang tudah Laja meh kitai, diak deh ia lalu angkat begadai nuju rumah panjai sida Raja Belut. Nyadi rumah panjai nya nyelaie amat di peda ia, semua rumah diak nadai ngentak ngena kayu, tak semina bedinding ke peku’ tanah magang-magang. Nya meh ia tu tadi majak berati ke menua nya.

        lebuh ke datai ba tengah laman rumah diak deh ia lalu nguji ngangau, ” oiii …. Jadi rumah kitak?!!!, aku tu Laja, ukai munsuh mai pengaruh, ukai antu mai penemu, enti rumah kitak jadi, ngambi aku ngetu ngenduh” pia deh ko Laja ngangau.Ninga tudah Laja ngangau, nya baru lantang deh ati bala Raja Belut. Ukai munsuh meh nya, ukai antu meh nya, ga ia madah kediri bakanya, pia meh ko peragam ati sida serumah. ” Jadi!!! Jadi!!!, lalu madi, lalu akan, lalu buat, lalu unggal, rumah kami enda kala di sagi mali, enda kala di unsut engkerabun mati, nadai di rembak ke entak pagar api….lalu igat” pia deh ko Raja Belut nyaut ari rumah. Nama agi deh, niki meh tudah Laja ke rumah sida Raja Belut tu tadi.

      Lebuh ke udah duduk, udah makai ko jerita, diak deh Raja Belut lalu nanya ke pejalai tudah Laja. Nya meh Laja lalu nusi ke bala Raja Belut tu tadi ke pejalai ia ke deka mansang ngambi Kumang ke Bini di menua Gelong. ” Aku enda nemu aya, nyangka Kumang udah jadi enggau orang bukai ke enda, nya meh ke ngasuh aku kin, ga ati enda ulih di tat,” pia deh ko Laja madah ngagai Raja Belut. Enda bemunyi Raja Belut ninga Laja munyi nya. Tudah Raja belut lalu ngulung ke insap ia, sambil ke ngesuh-ngesuh, nyirut ke insap ia. Udah nya Raja Belut lalu berunding ke chara ulih nulung Laja, ia lalu ngagau ke bala ia dua iku, ” kitu dulu seduai nuan igat, bisi utai ka di asuh dulu” pia deh ko Raja Belut ngagau ke bala ia dua iku nya.

    ” Nama deh aya, nama utai” pia deh ko seduai ia. ” Nya meh, ngasuh seduai nuan ngelubang nyentuk ngagai menua orang di Gelong, uji seduai nuan mending ke rita Kumang lalu begiga ke dini endur Keling, sekali ke seduai ia udah jadi tauka empai, ambi kitai ulih nulung igat Laja” pia deh ko Raja Belut bejaku. Nya meh kitai ngelengka ke dulu tudah Laja ke benung ba menua Raja Belut , kitai pulai baru ngagai jerita tudah Keling ke nyaru gamal diri nyadi Biju di menua Gelong……………………sesempa rampang pinang, segigi tangga………….

KELING BETABAN ENGGAU KUMANG

       Nyau ngenang tudah Biju meh kitai baru, ngenang ia ke nuju bilik sida Kumang lemai nya. Lebuh Biju datai di mua pintu ko jerita, diak deh ia lalu macha puchau siti, bakatu munyi leka puchau ia : “Kuring manding, lantai landa’ , kemi kesing, bau baya’….bangkai tau nyimpai, pendam tau tebuka” pia deh ko puchau tudah Biju tadi.

            Udah ia tembu macha leka puchau nya tadi, ia lalu belubah-lubah muka pintu sida Kumang. Lebuh ia ke malik ngagai bilik besai ko jerita, nadai ga ia meda orang duduk diak. Biju lalu bejalai ga ngagai bilik dapur, nadai ga ia meda orang ba dapur. “ Ni orang tu kini?, kada enda turun kumai kin memagang” pia deh ko jaku ia dalam ati diri meda bilik nyau nadai orang.